Іс-шараға еліміздің барлық өңірлерінен келген өкілдер, қоғамдық бірлестіктердің делегаттары, ардагерлер, кәсіпкерлер мен саясаткерлер қатысты. Мемлекет басшысы ел дамуының негізгі бағыттарын айқындап, Парламентті реформалау, вице-президент институтын енгізу және Қазақстан халқы Ассамблеясының жұмысын жетілдіру мәселелеріне тоқталды.

Солтүстік Қазақстан облысының тұрғындары Құрылтайда айтылған бастамаларға белсенді түрде пікір білдіріп, өз әсерлерімен бөлісуде.

Солтүстік Қазақстан облыстық ардагерлер кеңесінің төрағасы Ескендір Елеусізов Құрылтайдың Қызылордада өтуінің маңыздылығын атап өтті:

«Құрылтайдың дәл Қызылордада өтуі, менің ойымша, кездейсоқ емес. Бұл – соңғы жылдары айтарлықтай оң өзгерістер байқалып отырған қарқынды дамып келе жатқан өңір. Мен өзім Қызылордада шамамен бір жарым ай бұрын болып, Ардагерлер кеңесінің республикалық кеңесіне қатыстым және облыста әлеуметтік әрі мәдени бағытта ауқымды жұмыстар атқарылып жатқанын өз көзіммен көрдім.

Облыс әкімінің рөлін ерекше атап өткім келеді. Әлеуметтік бағыттағы көптеген нысандар, соның ішінде ірі инфрақұрылымдық жобалар инвесторлар есебінен жүзеге асырылып жатыр. Тіпті құны бірнеше миллиард теңгеге бағаланатын әуежай құрылысы да инвестициялық қаражат есебінен салынды. Бұл билік пен бизнес арасындағы өзара іс-қимылдың жоғары деңгейін көрсетеді. Президенттің өз сөзін облыс басшылығына алғыс айтудан бастауы да тегін емес. Мен де атқарылған жұмыстар мен нақты нәтижелер үшін ризашылығымды білдіремін», – деді Ескендир Елеусізов.

Ол Құрылтай тек өңірлік даму мәселелерін ғана емес, мемлекеттік басқару жүйесін реформалауды да қамтығанын айтты:

«Негізгі назар парламенттік өзгерістер мен Конституцияға енгізілетін түзетулерге аударылды. Мемлекет басшысы бастапқыда шамамен 40 түзету жоспарланғанын, алайда талқылау барысында олардың саны артуы мүмкін екенін атап өтті. Бұл – табиғи үдеріс. Жаңартылған парламенттік модельге көшу кезінде жаңа тәсілдер мен қосымша өзгерістердің қажеттілігі туындайды», – деді ол.

Оның айтуынша, Президенттің баяндамасы елдің тұрақты экономикалық даму бағытын айқын көрсетті:

«Бүгінде жан басына шаққандағы жалпы ішкі өнім шамамен 15 мың АҚШ долларына жетті. Бұл – еліміздің алға жылжып келе жатқанын көрсететін маңызды нәтиже. Экономиканы, инфрақұрылымды, идеологияны және басқа да салаларды дамыту одан әрі реформаларды талап етеді. Құрылымдық өзгерістер, функцияларды қайта бөлу, цифрландыруды дамыту – мұның барлығы мемлекеттің неғұрлым қарқынды әрі теңгерімді дамуына бағытталған біртұтас үдеріс», – деп түйіндеді Ескендир Елеусізов.

Қалалық ардагерлер кеңесі төрағасының орынбасары Иманғали Татваев парламенттік реформаның келешегі мен алдағы референдумға тоқталды:

«Президент бұған дейін жариялаған референдумның биыл өтетіні айтылды. Сонымен қатар Парламенттің бір палаталы болатыны жөніндегі бастама қуантты. Елде вице-президент лауазымы енгізіледі, ол қазіргі таңда мемлекеттік кеңесшінің құзыретіне кіретін бірқатар мәселелерді үйлестіретін болады. Бұл өзгерістер қоғамдық өмірімізге жаңа серпін береді деп ойлаймын», – деді Иманғали Татваев.

Ол Мемлекет басшысының өңірлердегі жағдай мен өзекті мәселелерден хабардар екенін де атап өтті:

«Арал теңізінің тартылуы мәселесін және қыздың қатыгездікпен өлтірілуіне қатысты жалғыз жағдайды атап өтіп, полиция департаментін тексеруді тапсырғаны – Президенттің елдегі ахуалды және халықтың мұң-мұқтажын жақсы білетінін көрсетеді. Біз бұл Құрылтайдан жаңа бастамалар күтеміз және ардагерлердің толық қолдауымен референдумға дайындаламыз», – деді ол.

Солтүстік Қазақстан облыстық мәслихатының депутаты Евгений Кинцель де өз пікірін білдірді:

«Құрылтайда айтылған Президент бастамаларын қолдаймын. Әсіресе вице-президент институтын енгізу мәселесі қызығушылық тудырды. Заңгер ретінде айтарым, бұл лауазым өте маңызды. Президенттік республикаларда Мемлекет басшысының өкілеттігі кең екенін ескерсек, оған көмектесетін сенімді тұлғаның болғаны аса қажет», – деді Евгений Кинцель.

Ол сондай-ақ Қазақстан халқы Ассамблеясы жұмысына енгізілетін жаңашылдықтардың маңыздылығына тоқталды:

«Мұнда Ассамблеяны тарату туралы емес, оның қызметін жетілдіру туралы сөз болып отыр. Халық Кеңесі халықаралық форумдарды ұйымдастырумен және Ассамблеяны заң шығарушы билік тармағында таныстырумен айналысады. Мұндай маңызды органның құрылуы еліміздегі қоғамдық келісімге оң әсер етеді деп ойлаймын», – деді депутат.

Солтүстікқазақстандықтар Ұлттық құрылтайдың V отырысын азаматтардың пікірін ескеруге және басқару мен әлеуметтік жүйені жаңғыртуға бағытталған маңызды қадам ретінде қабылдауда. Ардагерлер, депутаттар мен қоғам қайраткерлері Мемлекет басшысының бастамалары ел дамуына жаңа серпін беріп, ауқымды реформалардың бастамасына айналуы мүмкін екенін атап өтеді.