Бірнеше жыл ішінде фестиваль өңірдегі ең ауқымды әрі көпшілік асыға күтетін мәдени шаралардың біріне айналды. Ол кәсіби орындаушыларды, шығармашылық ұжымдарды және әртүрлі жастағы көрермендерді бір алаңда тоғыстырып, түрлі елдердің музыкалық мәдениетімен танысуға мүмкіндік береді.

Алты күн бойы Петропавл қаласының орталық алаңы ашық аспан астындағы үлкен концерттік алаңға айналады. Фестиваль қонақтарын қазақстандық және шетелдік өнерпаздардың өнер көрсетуі, әртүрлі жанрдағы концерттік бағдарламалар және мерекелік атмосфера күтеді. Әр күн белгілі бір музыкалық бағытқа арналмақ.

Фестиваль 5 шілдеде этно-музыка кешімен ашылады. Сахнада ұлттық дәстүр мен заманауи музыканы үйлестіре білген «Hassak» фольклорлық-этнографиялық ансамблі өнер көрсетеді.

6 шілде күні көрермендер заманауи би өнеріне арналған бағдарламаны тамашалай алады. Кештің арнайы қонағы – халықаралық Red Bull Dance Your Style жобасының финалисі Зере Қакимова.

7 шілдеде орталық алаңда диджейлер баттлы өтеді. Бұл кеш заманауи музыканы, ерекше атмосфераны және жастар мәдениетін біріктірмек.

8 шілдедегі фестиваль бағдарламасы эстрадалық музыкаға арналады. Бұл күні сахнада әртүрлі орындаушылар өнер көрсетіп, фестивальдің музыкалық бағдарламасын толықтыра түседі.

9 шілдеде классикалық музыка кеші ұйымдастырылады. Сахнаға Қазақстанның танымал өнерпаздары Ермек Қасым мен Зарина Алтынбаева шығады. Кештің арнайы қонағы – италиялық опера әншісі Angelo Forte.

Фестиваль 10 шілдеде қазақстандық танымал орындаушы Alem қатысатын ауқымды гала-концертпен қорытындыланады.

QYZYLJAR MUSIC FEST – бұл жай ғана концерттер топтамасы емес. Бұл – дәстүр мен заманауи өнерді, түрлі буын өкілдерін тоғыстыратын мәдени алаң. Фестиваль өңір тұрғындары мен қонақтарына музыкалық өнердің сан қырын танып, жаңа есімдерді ашуға және жазғы кештерді ерекше әсермен өткізуге мүмкіндік береді.

Ұйымдастырушылар барлық қала тұрғындары мен қонақтарын осы жарқын мәдени оқиғаның бір бөлігі болуға шақырады.

Фестиваль аясындағы барлық іс-шараларға кіру тегін. Өтетін күні: 2026 жылғы 5-10 шілде. Басталу уақыты: күн сайын сағат 19:00-де. Өтетін орны: Петропавл қаласының орталық алаңы.