Солтүстік Қазақстан облысы мал шаруашылығын дамытуда басқа өңірлерге үлгі болып отыр. Бұл туралы Қазақстан Президенті Қасым-Жомарт Тоқаев халыққа арнаған Жолдауында мәлімдеді. Бүгінде солтүстікқазақстандық шаруашылықтардың тәжірибесі негізінде елімізде жылына 462 мың тоннадан астам сүт өндіруге қауқарлы 71 сүт-тауар фермасы іске қосылды.

Мұндай жетістіктердің негізінде тек құнарлы жер мен сапалы мал азығы ғана емес, сонымен қатар малды күтіп-баптауға, селекциялық жұмысқа және өндірісті ұйымдастыруға деген сауатты көзқарас жатыр. Өз тәжірибесімен ауыл шаруашылығы саласында 40 жылға жуық еңбек етіп келе жатқан Мұрат Қаражұманов бөлісті.

Оның айтуынша, мал өнімділігін арттырудың басты шарттарының бірі – сапалы жемшөп пен малды жастайынан дұрыс күтіп-баптау. Солтүстік Қазақстан облысының құнарлы жері мен шүйгін шөптері мал азығын дайындауға қолайлы жағдай жасайды. Алайда мол өнім алу үшін табиғи мүмкіндіктермен қатар, малдың күтімі мен азықтандыру тәртібіне де ерекше көңіл бөлу қажет.

«Біздің өңірде мал шаруашылығын дамытуға қолайлы жағдай жасалған. Жеріміз құнарлы, шөп пен жемшөптің сапасы жоғары. Бірақ мұның өзі жеткіліксіз. Малға дұрыс күтім жасап, оны уақытылы әрі белгіленген рационына сәйкес азықтандыру керек. Әр малдың өзіндік азықтандыру тәртібі болғаны маңызды. Егер жануар жастайынан жақсы күтіп-бапталып, қажетті жемшөппен қамтамасыз етілсе, оның еті де, сүті де мол болады», – дейді Мұрат Қаражұманов.

Шаруашылықта өндіріс тиімділігін арттыру мақсатында цифрлық технологиялар да енгізілуде. Мамандарға қажетті бағдарламалар компьютерге орнатылып, сол арқылы мал азығының мөлшері мен құрамы есептеледі. Құрама жем мен басқа да қоректік қоспалар белгіленген көрсеткіштерге сәйкес беріледі. Мұндай тәсіл азықтандыру үдерісін жүйелі ұйымдастырып, малдың қажетті қоректік заттармен қамтамасыз етілуіне мүмкіндік береді.

Мал тұқымын асылдандыруға да ерекше мән беріледі. Шаруашылықта ет бағытындағы ангус, сондай-ақ сүт бағытындағы голштин және симментал тұқымды ірі қара өсіріледі. Бұл ет және сүт өндірісін қатар дамытуға, мал өнімділігін арттыруға мүмкіндік береді.

Мұрат Қаражұмановтың пікірінше, сапалы мал азығын, дұрыс күтіп-баптауды және заманауи технологияларды ұштастыру шаруашылықтардың өнімділігін арттырып, мал басын көбейтуге жол ашады.

Солтүстік Қазақстан аграрийлерінің осындай тәжірибесі еліміздің басқа өңірлерінде мал шаруашылығын дамытуға негіз болып отыр. Президент Жолдауында айтылған ауыл шаруашылығын жаңғырту бағыты өндіріс көлемін арттыруды ғана емес, сонымен қатар тиімді технологияларды енгізіп, Қазақстанның азық-түлік әлеуетін нығайтуды көздейді.