Қазақстан сары май мен күнбағыс майының өндірісі мен экспортын ұлғайтты

2026 жылдың қаңтар–сәуір айларының қорытындысы бойынша Қазақстанда сары май мен күнбағыс майын өндіру тұрақты өсім көрсетті. Сондай-ақ сыртқы саудада да оң динамика байқалды: өнімнің екі түрі бойынша экспорт көлемі ұлғайып, бұл отандық қайта өңдеу өнеркәсібінің әлеуеті артып келе жатқанын көрсетеді. Бұл туралы ҚР Ұлттық статистика бюросына сілтеме жасап SKO24.kz хабарлады.

ҚР Ұлттық статистика бюросының мәліметінше, есепті кезеңде республикада майлылығы 85%-дан аспайтын 13,8 мың тонна сары май өндірілген. Бұл өткен жылдың сәйкес кезеңімен салыстырғанда 47,4%-ға артық.

Осы уақыт аралығында сары май экспорты 40,4%-ға өсіп, 394,1 тоннаға жетті. Былтырғы жылдың қаңтар–сәуір айларында бұл көрсеткіш 280,7 тоннаны құраған. Қазақстандық сары май негізінен Ресейге, Моңғолияға, Қырғызстанға және Беларуське экспортталды.

Сары май импорты 2 242,2 тоннаны құрады. Импорттық өнімнің ішкі нарықтағы үлесі 13,9% болды. Негізгі жеткізушілер – Беларусь пен Иран. Ал төрт ай ішінде елдің ішкі нарығында 15,7 мың тонна сары май сатылды.

Күнбағыс майын өндіруде де оң өсім сақталды. Қаңтар–сәуір айларында қазақстандық кәсіпорындар 335,5 мың тонна тазартылған және тазартылмаған күнбағыс майын өндіріп, өткен жылдың сәйкес кезеңімен салыстырғанда көрсеткішті 13,2%-ға арттырды.

Күнбағыс майының экспорты 49,6%-ға өсіп, 353,8 мың тоннаға жетті. Оның ішінде Өзбекстанға 153,2 мың тонна, Қытайға 127,2 мың тонна, Ауғанстанға 38,6 мың тонна, Тәжікстанға 27 мың тонна және Иранға 4,9 мың тонна өнім жөнелтілді.

Есепті кезеңде Қазақстанға 47,9 мың тонна күнбағыс майы импортталды. Импорттың ішкі нарықтағы үлесі 12,5% деңгейінде сақталды. Ал қаңтар–сәуір айларында ел ішінде 29,7 мың тонна күнбағыс майы сатылды.