Қазақстанда партиялар өңірлердегі үгіт-насихат жұмыстарын жалғастыруда

Құрылтай сайлауына дейінгі үгіт-насихат жұмыстары жаңа кезеңге өтті. Партиялар бұрынғыдай жалпы ұрандарға емес, нақты бастамалар мен бағдарламалық ұсыныстарға көбірек мән беріп, сайлаушылармен кездесулерін өндіріс орындарында, әлеуметтік мекемелерде және мемлекеттік ұйымдарда өткізуді жалғастыруда, деп хабарлайды SKO24.kz.

Күн тәртібіндегі негізгі тақырыптардың бірі – өнеркәсіпті дамыту болды. «Әділет» партиясының делегациясы Қарағанды облысындағы «Qarmet» АҚ еңбек ұжымымен кездесіп, өндірісті жаңғырту, еңбек қауіпсіздігін күшейту және білікті мамандар даярлау мәселелерін талқылады.

Қазақстан Халық партиясы цифрлық мемлекеттік қызметтердің сапасын арттыруға назар аударды. Батыс Қазақстан облысында партия өкілдері «Азаматтарға арналған үкімет» мемлекеттік корпорациясы филиалының қызметкерлерімен кездесіп, электрондық сервистерді дамыту мен цифрлық бақылау тетіктерін жетілдіру жөніндегі ұсыныстарын ортаға салды.

Әлеуметтік бағыттағы жұмысты Жалпыұлттық социал-демократиялық партия жалғастырды. Партия кандидаты Нұрия Балтабайқызы Жезқазғандағы мүмкіндігі шектеулі жандарға арналған қолдау орталығы мен қарттар үйіне барып, әлеуметтік қорғау мәселелеріне қатысты пікір алмасты.

Өңірлерді дамыту мәселесіне «Ауыл» партиясы басымдық берді. Қостанайда партия төрағасы Қайрат Айтуғанов «Қазпошта» АҚ филиалының ұжымымен кездесіп, ауыл инфрақұрылымын дамыту, жаңа жұмыс орындарын ашу және жергілікті өзін-өзі басқаруды нығайтуға бағытталған бағдарламасын таныстырды.

Экологиялық бағыттағы жұмыстарын жалғастырған «Байтақ» партиясының кандидаты Владимир Мартель Алматы мемлекеттік табиғи қорығының қызметкерлерімен кездесіп, биоалуантүрлілікті сақтау мен ерекше қорғалатын табиғи аумақтарды қорғау мәселелерін талқылады.

Сонымен қатар партиялар арасындағы бағдарламалық пікірталас та күшейе түсті. Қазақстан Халық партиясы ЖСДП-ның экологиялық талаптарды бұзған кәсіпорындардың қызметін уақытша тоқтату туралы ұсынысын сынға алды. Партия өкілдерінің пікірінше, мұндай шешім жұмыс орындарының қысқаруына және еңбекақының кешігуіне әкелуі мүмкін. Оның орнына кәсіпорындарды мемлекеттік қолдау арқылы жаңғыртып, экологиялық таза технологияларды енгізу ұсынылды.

Экономикалық мәселелер төңірегіндегі пікірталас та жалғасын тапты. «Ақ жол» партиясы Ақтөбеде кәсіпкерлердің, IT саласы мен банк секторындағы мамандардың қатысуымен бизнес-форум өткізіп, шағын және орта бизнесті қолдауға арналған бастамаларын таныстырды.

Алайда бұл ұсыныстар Respublica партиясының сынына ұшырады. Павлодар облысындағы «Қызылжар-Құс KZ» құс фабрикасының ұжымымен кездесуде партия кандидаты Махамбет Хасенов әлеуметтік маңызы бар азық-түлік тауарларының бағасын мемлекеттік реттеуден шығару бастамасы тәуекелі жоғары қадам екенін айтты. Оның пікірінше, алдымен отандық өндірісті күшейтіп, халықтың табысын арттыру қажет. Бұған жауап ретінде «Ақ жол» партиясының өкілі Юрий Ли партияның экономикалық бағдарламасына қатысты ұстанымын түсіндірді.

Сарапшылардың пікірінше, «Ақ жол» мен Respublica партиялары арасындағы пікірталастың жиілеуі олардың ұқсас электораттың қолдауына ие болуға ұмтылуымен байланысты.

Жалпы, партиялардың күн тәртібіндегі мәселелер әртүрлі болғанымен, барлығының мақсаты ортақ – қоғам сұранысына нақты шешімдер ұсыну және сайлаушылардың сеніміне ие болу.