Қазақстан жаңалықтары
Қазақстан Республикасының 2026 жылғы 15 наурыздағы республикалық референдумда қабылданған преамбуласында табиғатқа ұқыпты қарау қажеттілігі атап өтілген. Осы тұрғыда «Таза Қазақстан» бастамасы конституциялық реформаны жүзеге асырудың және экологиялық жауапкершілікті қалыптастырудың маңызды құралы ретінде ерекше мәнге ие болып отыр, деп хабарлайды SKO24.kz.
Қазақстан Республикасының Үкіметі бекіткен «Таза Қазақстан» экологиялық мәдениетті дамыту тұжырымдамасы 2024–2029 жылдар аясында орнықты даму, экологиялық жағдайды жақсарту, халықтың өмір сапасын арттыру және инфрақұрылымды дамыту мәселелеріне басымдық берілген.
Осыған байланысты Парламентте бастаманы одан әрі кеңейту және институционалдандыру мәселесі талқылануда. Депутаттық ұсыныстар «Таза Қазақстанды» тұрақты жалпыұлттық қозғалысқа айналдыруға бағытталған.
Атап айтқанда, «Таза Қазақстан» қағидаттарын барлық саяси партиялардың бағдарламаларына енгізу ұсынылуда. Бұл бастама идеологиядан жоғары тұрған, барша қоғамды біріктіретін ұлттық құндылық ретінде қарастырылуда. Сонымен қатар ел көлемінде экологиялық шараларды үйлестіретін тұрақты жұмыс істейтін ұлттық штаб құру қажеттілігі айтылуда.
Депутаттар «Таза Қазақстан» бірыңғай цифрлық платформасын құруды да ұсынады. Бұл платформа арқылы азаматтар экологиялық акциялар, жобалар және олардың нәтижелері туралы ақпарат ала алады.
Бастама аясындағы іс-шаралар жыл бойы жүргізілуі тиіс екені атап өтіледі. Дегенмен көктем мен күз негізгі белсенді кезеңдер болып қала береді. Сондықтан жыл мезгілдеріне тәуелсіз көрінетін ауқымды жобалар қажет — қоқыс жинау, табиғи және тарихи нысандарды жазулардан тазарту сияқты.
Сонымен қатар су ресурстарын тиімді пайдалану мәселесіне ерекше көңіл бөлінуде. Бұл бағытта жаңбыр және еріген қар суын жинап, тазалап, ауыл шаруашылығына пайдаланатын арнайы резервуарлар жүйесін енгізу ұсынылады.
Одан бөлек, елді мекендер арасындағы жол бойында көпжылдық ағаштардан «жасыл дәліздер» құру бастамасы көтерілуде. Бұл қыс мезгіліндегі қар үйінділерін азайтып, жолдардың жабылу жиілігін төмендетуге мүмкіндік береді.
Осылайша, «Таза Қазақстан» экологиялық науқан шеңберінен шығып, орнықты даму мен экологиялық мәдениетті қалыптастыруға бағытталған ұлттық деңгейдегі кешенді платформаға айналып келеді.
