Қазақстандық партиялар сайлаушылармен кездесуге шықты - сайлауалды науқанның екінші күніндегі күн тәртібі қалай өзгерді

Сайлауалды штабтар ашылғаннан кейін саяси партиялар сайлауалды науқанның келесі кезеңіне – сайлаушылармен тікелей кездесуге көшті, деп хабарлайды SKO24.kz ақпараттық DKNews.kz агенттігіне сілтеме жасап.

Партиялар әртүрлі аудиторияны таңдады: бірі кәсіпкерлермен кездесті, енді бірі өндіріс орындарын аралады, жастармен жұмысты күшейтті немесе экологиялық акциялар ұйымдастырды. Осылайша үгіт-насихат жұмысы ресми іс-шаралардан нақты саяси диалогқа ұласты.

«Әділет» Түркістан облысынан бастады

«Әділет» партиясы өңірлік үгіт-насихат науқанын Түркістан облысынан бастады.

Кандидаттар күні бойы зиялы қауым өкілдерімен, мұғалімдермен, дәрігерлермен, қолөнершілермен, спортшылармен, кәсіпкерлермен және жергілікті тұрғындармен кездесті. Кездесулер барысында инфрақұрылымды дамыту, туризмді өркендету, шағын және орта бизнесті қолдау, ауылдық аумақтарды дамыту және әлеуметтік саясат мәселелері талқыланды.

Сонымен қатар партияның «Әділетті Қазақстан үшін» мобильді керуендері жұмысын бастады.

ЖСДП ашық пікірталас өткізді

Жалпыұлттық социал-демократиялық партия (ЖСДП) Астанада журналистердің, саясаттанушылардың және блогерлердің қатысуымен дөңгелек үстел ұйымдастырды.

Кездесу барысында сайлауалды науқанның барысы, партиялар арасындағы бәсекелестік, кадр саясаты және саяси жүйені дамыту мәселелері талқыланды.

«Байтақ» экологиялық марафон ұйымдастырды

«Байтақ» жасылдар партиясы үгіт-насихат жұмыстарын экологиялық марафонмен жалғастырды.

Астанадағы Триатлон паркінде өткен шараға 200-ден астам адам қатысты. Олардың қатарында партия белсенділері, еріктілер, экобелсенділер және кандидаттар болды. Қатысушылар 2,5 шақырымдық қашықтықты жүгіріп өткеннен кейін сайлаушылармен еркін форматта кездесті.

ҚХП өндіріс орындарының еңбек ұжымдарымен кездесті

Қазақстанның Халық партиясы Павлодар облысындағы өнеркәсіп кәсіпорындарының еңбек ұжымдарымен кездесті.

Кездесу барысында еңбек жағдайын жақсарту, әлеуметтік қолдау және өндірістегі қауіпсіздік мәселелері талқыланды. Партия еңбек ұжымдарымен тікелей диалогқа басымдық берді.

«Ауыл» жастарға және өндіріске назар аударды

«Ауыл» партиясы екінші күнгі жұмысын бірнеше бағытта жүргізді.

Алдымен партия басшылығы AUYL JASTARY жастар қанатының республика бойынша өтетін үгіт-насихат шараларына дайындық барысымен танысты.

Кейін кандидаттар Астанадағы «СтальЦинк» кәсіпорнына барып, оның жұмысымен танысып, еңбек ұжымымен кездесті. Кездесу барысында өндірісті дамыту, кәсіпкерлікті қолдау, өңірлік экономиканы нығайту және еңбек адамының мәртебесін арттыру мәселелері сөз болды.

Күн соңында партияның әлеуметтік желідегі ресми парақшасында Жигули Дайрабаевтың қатысуымен тікелей эфир өтті.

«Ақ жол» экономикалық мәселелерге басымдық берді

«Ақ жол» демократиялық партиясының төрағасы Дания Еспаеваның жетекшілігімен партия өкілдері сайлаушылармен кездесулерін жалғастырды.

Кездесулер барысында экономикалық саясат, кәсіпкерлікті қолдау, сайлаушылар көтерген өзекті мәселелер және сайлауалды науқанның барысы талқыланды.

Respublica Қарағанды облысынан бастады

Respublica партиясы өңірлік сапарларын Қарағанды облысынан бастады.

Партия делегациясы ауыл шаруашылығы кәсіпорындарын аралап, фермерлермен және аграрлық сектор өкілдерімен кездесті. Кездесу барысында ауыл шаруашылығын дамыту, саланы мемлекеттік реттеу және агробизнестегі өзекті мәселелер талқыланды.

Екінші күн нені көрсетті?

Сайлауалды науқанының екінші күні партиялардың жұмысы жаңа кезеңге өткенін көрсетті. Егер алғашқы күн штабтардың ашылуымен ерекшеленсе, енді басты назар өңірлердегі кездесулерге, еңбек ұжымдарымен, кәсіпкерлермен, жастармен және қоғам белсенділерімен тікелей диалог орнатуға ауды.

Әр партия өз электоратына жақын форматты таңдауға тырысты. Бірі пікірталас өткізсе, енді бірі марафон ұйымдастырды немесе өндіріс орындары мен ауыл шаруашылығы кәсіпорындарын аралады. Алдағы күндері дәл осындай өңірлік кездесулер мен сайлаушылармен тікелей байланыс сайлауалды науқанының негізгі бағытына айналмақ.