Маңызды ақпарат! Солтүстік Қазақстан облысында жылу беру маусымы 28 қыркүйектен басталады

Солтүстік Қазақстан облысында жылу беру маусымының қашан басталатыны белгілі болды. Тұрғын үйлерге жылу 28 қыркүйектен бастап кезең-кезеңімен беріле бастайды. Бұл туралы өңір әкімі Ғауез Нұрмұхамбетов Қазақстан Республикасының Премьер-министрі Олжас Бектеновтің төрағалығымен өткен Үкімет отырысында мәлімдеді, деп хабарлайды SKO24.kz.

Ғауез Нұрмұхамбетов Петропавл ЖЭО-2 жылу маусымының басында жылу беруді қамтамасыз етуге дайын екенін айтты. Жұмысқа 8 қазан агрегаты дайындалды. Жөндеу науқаны аясында 6 қазандық пен 6 турбинадағы жұмыстар аяқталды. Петропавлдың жылу магистральдарын дайындау жұмыстары 20 қыркүйекке дейін аяқталады деп жоспарланған.

Еске сала кетейік, өткен жылы Петропавлда жылу беру маусымы 24 қыркүйекте басталған болатын. Әдетте жылу алдымен әлеуметтік нысандарға — мектептерге, балабақшаларға және медициналық ұйымдарға беріледі. Одан кейін қалған ғимараттар жылу жүйесіне қосылады.

Бұған дейін Петропавл ЖЭО-2-де жылу беру маусымына дайындық аясында ауқымды жөндеу жұмыстары жүргізіліп жатқаны хабарланған еді. Жұмыстарға шамамен 21 миллиард теңге бағытталған.

Қазіргі уақытта №6 және №9 қазан агрегаттарында, сондай-ақ №4 турбоагрегатта күрделі жөндеу жұмыстары жүргізілді. Компания №10 және №11 қазан агрегаттарындағы жұмыстарды 30 қыркүйекке дейін толық аяқтауды жоспарлап отыр. Барлық ағымдағы және жоспарлы жөндеу жұмыстары бекітілген кестеге сәйкес жүргізілуде.

Сонымен қатар №9, 10 және 11 секциялардың 6 кВ КРУ электр техникалық жабдықтарын реконструкциялау, күл үйіндісінің тірек бөгеттерін көтеру және №3 түтін мұржасын реконструкциялау бойынша маңызды жобалар жүзеге асырылуда.

Жөндеу науқанының сәтті аяқталуы жабдықтардың тозуын айтарлықтай азайтып, станция жұмысының сенімділігін арттыруға және қысқы кезеңдегі жоғары жүктемелер кезінде қаланы жылу мен электр энергиясымен тұрақты қамтамасыз етуге мүмкіндік береді.