«Әр дауыстың маңызы бар», – солтүстікқазақстандық Владимир Витченко Құрылтай депутаттарын сайлау туралы

Мемлекет басшысы Қасым-Жомарт Тоқаев Құрылтай ашық жалпыұлттық диалог алаңы және қоғамның өзекті сұраныстарына жедел ден қою тетігі болуы керектігін атап өткен болатын. Бірнеше аптадан кейін қазақстандықтар жаңа органның құрамын айқындайтын маңызды таңдау жасайды. Қазақстандағы Ресей, славян және казак ұйымдары қауымдастығының Солтүстік Қазақстан филиалының төрағасы Владимир Витченко азаматтарды алдағы Құрылтай депутаттарының сайлауына белсенді қатысуға шақырды, деп хабарлайды SKO24.kz.

Сайлауға бір айдан аз уақыт қалды – ол 23 тамызға белгіленген. ҚР Орталық сайлау комиссиясының соңғы мәліметтері бойынша, Құрылтай депутаттарының мандатына үміткер 7 саяси партияның тізіміне 545 кандидат енгізілген. Ал жаңа органның құрамына 145 депутат кіреді.

«Бұл – Қазақстанның стратегиялық дамуы үшін маңызды оқиға. Жақында өткен референдумда біз жаңа Конституцияны қабылдадық. Енді барлық заңнаманы оған толық сәйкестендіру қажет. Соның ішінде осы бағытта да депутаттарға жұмыс істеуге тура келеді. Әлем тез өзгеріп жатыр. Қазақстан заман ағымынан қалып қоймай, болашақты болжау арқылы алға қадам басуы керек. Құрылтайдың алғашқы құрамын қалыптастыру әрбір азаматтың белсенді қатысуын талап етеді. Біз бәріміз сайлау учаскелеріне барып, өзіміздің саналы таңдауымызды жасауымыз керек», – деді Владимир Витченко.

Солтүстікқазақстандық азамат әрбір адамның дауысы елдің тұрақтылығына, бірлігіне және болашағына қосқан жеке үлесі екенін атап өтті. Владимир Витченко азаматтарды барлық саяси партиялардың сайлауалды бағдарламаларымен мұқият танысып, саналы таңдау жасауға шақырды.

«Әрине, әр депутат өз уәдесін орындауға міндетті. Бұл – күрделі әрі үлкен жауапкершілікті талап ететін жұмыс. Депутаттар жоғары білікті болуы, мемлекеттің даму бағытын нақты түсінуі және елдің алдағы жылдар мен онжылдықтарға арналған стратегиялық мақсаттарын көре білуі керек. Халық қалаулылары өздерін толығымен қоғамға қызмет етуге арнауы тиіс. Қазақстанның әрбір азаматы Құрылтайда оның мүддесін білдіретін адамдар бүкіл халықтың еркін шынымен жеткізетініне сенімді болуы қажет», – деп атап өтті солтүстікқазақстандық.

Владимир Витченко тұрғындарды бұл маңызды тарихи оқиғадан тыс қалмай, сайлауға белсенді қатысуға шақырды.