СКО-да ҚАЖ мекемелерінде Абай мен Бауыржан Момышұлына арналған қойылымдар өтті

Солтүстік Қазақстан облысының қылмыстық-атқару жүйесі мекемелерінде қазақ халқының ұлы тұлғалары Абай Құнанбайұлы мен Бауыржан Момышұлының өмірі мен өнегесіне арналған театрландырылған қойылымдар ұйымдастырылды, деп хабарлайды SKO24.kz.

Іс-шаралар облыс прокуратурасының үйлестіруімен, Қылмыстық-атқару жүйесі департаменті және облыс әкімдігінің бірлесуімен №48 және №51 мекемелерінде өткізілді. Оларға 700-ден астам сотталған қатысты.

Қойылымдардың мақсаты – сотталғандардың рухани-адамгершілік және мәдени тәрбиесін арттыру, заңға және қоғамдық құндылықтарға құрмет қалыптастыру, сондай-ақ жасаған әрекеттері үшін жеке жауапкершілікті түсіндіру.

Көрсетілімдерде Абай Құнанбайұлы мен Бауыржан Момышұлының өмір жолы мен мұрасы кеңінен дәріптелді. Ұлы тұлғалардың білім, еңбек, тәртіп, ар-намыс, жауапкершілік және қоғамға қызмет ету туралы ұстанымдарына ерекше мән берілді.

Мұндай тәрбиелік іс-шаралар сотталғандарды қайта әлеуметтендіруге, олардың оң көзқарасын қалыптастыруға және қайталама қылмыстардың алдын алуға бағытталған кешенді жұмыстың маңызды бөлігі саналады.

СКО-да сотталғандардың түзелуіне, білім мен кәсіп меңгеруіне және босатылғаннан кейін қоғамға заңға бағынатын азамат ретінде оралуына бағытталған жұмыстар жалғасуда.