СҚО-да құтқарушылар тұрғын сектордағы өрттің алдын алу бойынша профилактикалық жұмыстарды күшейтті

Жылыту маусымы басталған кезде тұрғын үйлерде өрт шығу қаупі артады. Осыған байланысты СҚО Төтенше жағдайлар департаментінің қызметкерлері жеке секторларда профилактикалық жұмыстар жүргізіп, тұрғындарға өрт қауіпсіздігі талаптарын сақтауды ескертуде, деп хабарлайды SKO24.kz.

Профилактикалық іс-шаралар барысында құтқарушылар аулаларды аралап, тұрғындармен кездесулер өткізуде және түсіндіру жұмыстарын жүргізуде. Мамандар пешпен жылыту жүйелерінің, электр сымдарының және жылыту құрылғыларының жағдайына ерекше назар аударады.

Пешті пайдаланбас бұрын оның және түтін мұржасының жарамдылығын тексеру қажет. Түтін мұржасын күйеден уақытылы тазалап, пештің шамадан тыс қызуына жол бермеу керек. Электр сымдарының жағдайын бақылап, зақымдалған электр құрылғылары мен ақаулы жылытқыштарды пайдалануға болмайды.

Жылыту маусымында жанып тұрған пеш пен қосулы электр жылытқыштарын қараусыз қалдыруға болмайды. Сондай-ақ балаларға пеш жағуды тапсырмау және сіріңкені олардың қолы жетпейтін жерде сақтау қажет.

Құтқарушылар көміртек тотығымен уланудың алдын алуға да ерекше көңіл бөледі. Тұрғындарға түтін мұржалары мен желдету жүйелерінің дұрыс жұмыс істеуін қамтамасыз ету, сондай-ақ қауіпті дер кезінде ескертетін автономды көміртек тотығы датчиктерін орнату ұсынылады.

«Профилактикалық жұмыстар, ең алдымен, халықтың әлеуметтік осал санаттарына және ерекше назар аударуды қажет ететін отбасыларға бағытталған. Тұрғындарды өрт қауіпсіздігі ережелерін сақтауға шақырамыз», – деп атап өтті СҚО ТЖД мамандары.

Құтқарушылар өрт немесе басқа да төтенше жағдай туындаған кезде 101 немесе 112 нөмірлеріне дереу хабарласу қажеттігін еске салады.