СҚО тұрғындары Республика күніне орайластырылған «Republic Day» және «Bereke Fest» акциялары аясында тиімді сауда жасай алады

Республика күні қарсаңында Солтүстік Қазақстан облысында «Republic Day» және «Bereke Fest» республикалық акциялары өтеді. Акциялар 2026 жылғы 17 қазанда басталып, 27 қазанға дейін қоса алғанда жалғасады. Осы кезеңде сатып алушыларға түрлі тауарлар жеңілдетілген бағамен ұсынылады, деп хабарлайды SKO24.kz.

Мерекелік жеңілдіктердің ең қызу кезеңі 21–27 қазан аралығына жоспарланған. Дәл осы күндері акциялардың негізгі бөлігі, арнайы баға ұсыныстары мен мерекелік жеңілдіктер ұйымдастырылады. Сатып алушылар азық-түлік және азық-түлікке жатпайтын тауарларды тиімді бағамен сатып ала алады.

Жалпыреспубликалық науқанның бастамашылары — Қазақстан Республикасы Сауда және интеграция министрлігі мен жергілікті атқарушы органдар.

Акциялар ұлттық мерекеге орай ұйымдастырылып, халық үшін қажетті тауарлардың қолжетімділігін арттыруға, тұтынушылық сұранысты қолдауға және ішкі сауданың дамуына серпін беруге бағытталған. Сонымен қатар отандық өндірушілердің өнімдерін өткізу мүмкіндіктерін кеңейтуге ерекше көңіл бөлінеді.

«Republic Day» және «Bereke Fest» акцияларына «Dostyq Mall», «City Mall», «Рахмет» сауда-ойын-сауық орталықтары, «Aimer», «Семейный» және «Северный» супермаркеттері, сондай-ақ басқа да көптеген сауда нысандары қатысады.