Солтүстік Қазақстан облысында медицина қызметкерлеріне құрмет көрсетілді

Медицина қызметкерлері күніне арналған салтанатты іс-шара өтті. Аймақ басшысы денсаулық сақтау саласының қызметкерлерін кәсіби мерекелерімен құттықтап, олардың өңір тұрғындарының өмірі мен денсаулығын сақтаудағы өлшеусіз еңбегін ерекше атап өтті, деп хабарлайды SKO24.kz.

«Мемлекет басшысы Қасым-Жомарт Тоқаев дәрігерлерді бейбіт күннің батырлары деп әділ бағалады. Денсаулық сақтау жүйесін дамыту және медицина қызметкерлерін қолдау – мемлекеттік саясаттың басым бағыттарының бірі. Өңірде денсаулық сақтау саласын жаңғырту жұмыстары жүйелі түрде жалғасуда. Соңғы үш жылда саланы қаржыландыру көлемі 2,5 еседен астам өсіп, 2022 жылғы 3,9 млрд теңгеден 2025 жылы 10,4 млрд теңгеге жетті. Жүзеге асырылып жатқан бұл жобалардың барлығы медициналық көмектің сапасы мен қолжетімділігін арттыруға, саланың кадрлық әлеуетін нығайтуға және медицина қызметкерлеріне лайықты еңбек жағдайларын жасауға бағытталған», – деді Ғауез Нұрмұхамбетов.

Үш жылдың ішінде өңірде ауысымына 250 адам қабылдайтын үш заманауи емхана пайдалануға берілді, 60-тан астам денсаулық сақтау нысаны жаңғыртылып, медициналық ұйымдар 600-ден астам заманауи медициналық құрал-жабдықпен қамтамасыз етілді.

Ауылдық денсаулық сақтауды дамытуға ерекше көңіл бөлінуде. Ұлттық жоба аясында облыс аудандарында 46 жаңа медициналық нысан салынып, ауыл тұрғындарының сапалы медициналық көмекке қолжетімділігі едәуір артты.

Биыл Айыртау ауданында 100 төсектік аурухана мен бір ауысымда 250 адам қабылдайтын емхананың құрылысы басталады. Петропавл қаласында жедел медициналық жәрдем станциясының жаңа ғимаратының құрылысы басталды. Ал Бескөл ауылында бір ауысымда 250 адам қабылдайтын заманауи емхана бой көтеруде.