СҚО жаналықтары
Солтүстік Қазақстан облысының тұрғындарына бруцеллездің алдын алу шараларын сақтау қажеттігі еске салынды. Тиісті ақпаратты өңірдің санитариялық-эпидемиологиялық бақылау департаменті таратты, деп хабарлайды SKO24.kz.
Бруцеллез – адам мен жануарлардың жүйке жүйесі мен тірек-қимыл аппаратына әсер ететін созылмалы жұқпалы ауру. Мамандардың айтуынша, аурудың алғашқы белгілері жалпы әлсіздік, дене қызуының 39–40 градусқа дейін көтерілуі, бас ауруы және буындардың ауыруымен байқалады. Ауру шамамен үш айға созылуы мүмкін, алайда кейбір жағдайларда бір-екі жылға дейін жалғасып, дер кезінде емделмесе созылмалы түрге айналады. Бұл ауыр асқынуларға, соның ішінде мүгедектік пен бедеулікке әкелуі мүмкін.
Ведомство мәліметінше, адам көбіне ауру малмен байланыс кезінде — оларды күту немесе сою барысында жұқтырады. Сонымен қатар, инфекция шикі сүтті, етті және сүт өнімдерін тұтыну арқылы да берілуі мүмкін.
Аурудың негізгі алдын алу шараларына ауыл шаруашылығы жануарларын тұрақты ветеринариялық бақылаудан өткізу жатады. Мамандар жылына кемінде екі рет малды бруцеллезге тексеруді ұсынады. Егер инфекция анықталса, ауру малды 15 күн ішінде сою қажет. Сондай-ақ мал ұстайтын орындарды міндетті түрде дезинфекциялау керек, өйткені арнайы құралдар қоздырғышты жойып, инфекцияның таралуын болдырмайды.
Қауіпсіз тамақтану ережелерін сақтау да өте маңызды. Сүтті міндетті түрде қайнатып ішу ұсынылады, себебі бруцеллез қоздырғышы 100 градус температурада бірнеше минут ішінде жойылады. Ет пен сүт өнімдерін тек тексерілген, ресми сауда орындарынан сатып алу қажет. Кездейсоқ сатушылардан немесе рұқсат етілмеген жерлерден алынған өнімдер жұқтыру қаупін арттырады.
Жануарларға күтім жасау кезінде жеке гигиена ережелерін қатаң сақтау қажет. Қорада жұмыс істегеннен кейін, жануарлармен немесе мал өнімдерімен байланыстан соң қолды мұқият жуу керек. Осындай қарапайым шаралар инфекция жұқтыру қаупін едәуір төмендетеді.
Мамандар бұл ұсыныстарды елемеу ауыр салдарға әкелуі мүмкін екенін ескертеді. Алдын алу шараларын сақтамау тек адамның өзіне ғана емес, оның жақындарына да қауіп төндіреді.
