Солтүстік Қазақстан облысының бизнесі «100 игі іс» акциясы аясында әлеуметтік жобаларды жүзеге асыруда

2026 жылғы 24 сәуірде «Заң мен тәртіп» тұжырымдамасын іске асыру аясында облыстық қадағалау органының бастамасымен бизнес-қоғамдастық өкілдерінің қатысуымен «Заң мен тәртіп үшін бизнестен 100 игі іс» атты ауқымды акция өткізілді, деп хабарлайды SKO24.kz.

Іс-шара барысында өңір кәсіпкерлері ауылдық аумақтардың инфрақұрылымын дамытуға және тұрғындардың өмір сүру сапасын арттыруға бағытталған бірқатар әлеуметтік жобаларды жүзеге асырды.

Атап айтқанда, Шал ақын ауданында «Алтын Астық КЗ» ЖШС 182 адам тұратын Ступинка ауылында фельдшерлік-акушерлік пункттің құрылысын жүргізуде. Жоба ауыл тұрғындарын алғашқы медициналық-санитарлық көмекпен қамтамасыз етіп, медициналық қызмет сапасын арттыруға және ауылдық денсаулық сақтау жүйесін нығайтуға мүмкіндік береді.

Аққайың ауданында «Полтавское» ЖШС өз қаражаты есебінен Полтавка ауылындағы мектепте ақпараттық технологиялардың заманауи сыныбын жабдықтады. Кабинет қажетті материалдық-техникалық базамен қамтамасыз етіліп, оқушылардың цифрлық сауаттылығын арттыруға, ғылыми-зерттеу жұмыстарына қызығушылығын дамытуға және олимпиадалар мен байқауларға дайындық деңгейін көтеруге бағытталған.

Мамлют ауданында «Денсаулық рецепті» ЖШС Новомихайловка ауылында жылжымалы дәріхана ұйымдастырды. Бұл бастама 750 тұрғынның дәрі-дәрмекке қолжетімділігін арттырып, халықтың денсаулығын сақтау мен әлеуметтік әл-ауқатын жақсартуға ықпал етеді.

Жалпы аталған шаралар бизнестің әлеуметтік жауапкершілігін нығайтуға, мемлекет пен кәсіпкерлік сектор арасындағы әріптестікті дамытуға, сондай-ақ қоғамда өзара қолдау мен заңға құрмет мәдениетін қалыптастыруға бағытталған. Мұндай бағыттағы жұмыстар алдағы уақытта да жалғасын табады.