Солтүстік Қазақстан облысының Мағжан Жұмабаев ауданында «Таза Қазақстан» акциясы аясында «Бүкілқазақстандық ағаш отырғызу күні» өтіп жатыр

Солтүстік Қазақстан облысында жастар арасында экологиялық мәдениетті қалыптастыруға және әлеуметтік жауапкершілікті дамытуға бағытталған бастамаларды іске асыру жалғасуда, деп хабарлайды SKO24.kz.

Мағжан Жұмабаев ауданы Мемлекет басшысының бастамасымен «Таза Қазақстан» бағдарламасы аясында 21–26 сәуір аралығында өтіп жатқан «Бүкілқазақстандық ағаш отырғызу күні» республикалық акциясына қосылды.

Жасыл бастаманы аудан тұрғындары қолдады. Бүгін жалпы елді мекендер мен орман алқаптарында 20 мыңға жуық көшет отырғызылуда. Ардагерлер, қоғам қайраткерлері, жергілікті атқарушы органдардың, ұйымдар мен кәсіпорындардың өкілдері, жастар, еріктілер, депутаттар мен экоактивистер аудан аумағын көгалдандыру үшін күш біріктіріп, ауқымды жұмыс атқаруда.

Ағаш отырғызу шарасына аудан әкімі Рахат Смағұлов, ауданның құрметті азаматтары Оралбай Сағандықов пен Сергей Заев қатысты. Сондай-ақ Солтүстік Қазақстан облысы табиғи ресурстар және табиғатты пайдалануды реттеу басқармасының «Булаев орман шаруашылығы» КММ қызметкерлері мен Булаев қаласының мектеп оқушыларынан құралған орманшылары белсенді атсалысуда.

«Экологиялық акцияның негізгі мақсаты — қоршаған ортаны қорғау, елді мекендерді көгалдандыру және халықтың табиғатқа жауапкершілігін арттыру. Мұндай бастамалар өңірдің экологиялық ахуалын жақсартып, жасыл қорды арттыруға ықпал етеді. Отырғызылған көшеттер тұрақты бақылауда болып, тиісті күтім жасалады», — деп атап өтті.