СҚО жаналықтары
СҚО-да Мемлекет басшысының бастамасымен қолға алынған «Таза Қазақстан» ауқымды экологиялық акциясы ұйымдастырылды. Акция облыстың барлық ауданын қамтып, мыңдаған тұрғынды біріктірді. Іс-шаралар облыс орталығында да ұйымдастырылды, деп хабарлайды SKO24.kz.
Петропавлда негізгі локация Пестрое көлі маңы болды. Мұнда «Qyzyljar» эко-паркі жобасы іске асырылуда. Болашақ кеңістіктің жалпы аумағы 41 гектарды құрайды. Бүгін 450-ден астам адам аумақты абаттандыруға үлес қосып, 200 ағаш отырғызды. Олардың қатарында белсенді қала тұрғындары, волонтерлер, кәсіпкерлер және бейжай қарамайтын азаматтар бар. Акцияға Солтүстік Қазақстан облысының әкімі Ғауез Нұрмұхамбетов те қатысты.
«Бүгін Мемлекет басшысының қатысуымен бүкіл республика бойынша «Таза Қазақстан» экологиялық акциясы өтті. Екі жылдың ішінде бағдарлама тазалық, абаттандыру және қоршаған ортаға ұқыпты қарау идеялары төңірегінде азаматтарды біріктірген маңызды жалпыұлттық қозғалысқа айналды. Өткен жылы 200 мыңнан астам ағаш пен бұта отырғызылды, биылғы жоспар – 155 мың. Ең бастысы – акция өңірдің мыңдаған тұрғынын біріктірді. Әсіресе белсенді әрі бастамашыл жастардың көп болғаны қуантады. Бұл қоршаған орта алдындағы жауапкершілігін түсінетін жаңа буын қалыптасып келе жатқанын көрсетеді», – деді өңір басшысы.
Қатысушылардың арасында жастар көп болды. Волонтерлер мен студенттер экологиялық бастамаларды белсенді қолдап, сенбіліктер мен «таза бейсенбіліктерге» тұрақты қатысып, абаттандыру бойынша өз идеяларын ұсынады.
«Біздің жастар барлық экологиялық акцияларға жүйелі түрде қатысады – олар сенбіліктерді де, «таза бейсенбіліктерді» де қалдырмайды. Сонымен қатар өздері бастама көтеріп, өзгелерді де тартады. Біз болашақты ойлайтын жауапты ұрпақ қалыптасып келе жатқанын көріп отырмыз. Әрине, біз жастарымызды мақтан тұтамыз», – деп атап өтті «Birgemiz» волонтерлік фронт-офисінің жетекшісі Анастасия Волкова.
Ағаш отырғызу жұмыстары облыс аудандарында да өтті. Жалпы өңір бойынша акцияға 12 мыңнан астам адам қатысып, 70 мың ағаш отырғызылды.
Мағжан Жұмабаев ауданы ерекше белсенділік танытты. Мұнда мұндай акциялар тұрақты тәжірибеге айналған – тұрғындар экологиялық іс-шараларға үнемі қатысып, көгалдандыру бастамаларын қолдайды.
«Бүгін тек Булаев қаласының өзінде 7 мыңнан астам ағаш отырғыздық, ал аудан бойынша шамамен 20 мың көшет егілді. Орман шаруашылығы саласының қызметкерлері ретінде біз үшін тұрғындардың орман мен жасыл желектің маңызын түсініп, оны отырғызуға белсенді қатысып жатқанын көру өте маңызды. Бұл бірлескен күш-жігердің арқасында жасыл қорымызды кеңейтетінімізге сенім береді», – деді «Булаевское» орман шаруашылығының орманды молықтыру және орман өсіру жөніндегі инженері Георгий Серебренников.
Акцияға барлық жастағы тұрғындар – оқушылардан бастап аға буын өкілдеріне дейін қатысты.
«Мен бүгін отбасыммен бірге келдім, өйткені мұны өзімнің парызым әрі балаларымыздың тәрбиесінің бір бөлігі деп санаймын. Біз таза әрі жасыл жерде өмір сүргіміз келеді, ал көп нәрсе өзімізге байланысты. Мұндай акциялар адамдарды біріктіреді және балаларға кішкентай істің өзі үлкен нәтижеге үлес қоса алатынын түсіндіреді», – деп бөлісті Булаев қаласының тұрғыны Александр Кравченко.
«Таза Қазақстан» экологиялық акциясы өңірде жалғасады. СҚО-да бұл бастаманы қолдау жүйелі жұмысқа айналып келе жатқанын көрсетіп отыр. Мұнда әрбір тұрғын жайлы әрі экологиялық орта қалыптастыруға және ел болашағына өз үлесін қосуға дайын.
