СҚО жаналықтары
Солтүстік Қазақстан облысының барлық аудандарында және Петропавл қаласында «Жол қозғалысына қатысушылардың қауіпсіздігі» акциясы өткізілді. Іс-шара «Заң және Тәртіп» идеологиясын ілгерілету тұжырымдамасын іске асыру аясында ұйымдастырылды, деп хабарлайды SKO24.kz.
Акцияның мақсаты – оқушылардың велосипедтер мен самокаттарды пайдалану кезіндегі қауіпсіздік деңгейін арттыру, сондай-ақ балаларда жол қозғалысы ережелерін сақтау дағдыларын қалыптастыру.
Іс-шараға 4-7 сынып оқушылары және облыс мектептеріндегі жас жол инспекторлары клубтарының мүшелері қатысты. Жалпы қамтылуы 1000-нан астам оқушыны құрады.
Прокуратура полиция және білім бөлімдерімен бірлесіп велосипедтер мен самокаттарды қауіпсіз басқару бойынша тәжірибелік сабақтар ұйымдастырды. Оқушыларға жол қозғалысы ережелерінің негізгі талаптары түсіндіріліп, жолдағы қауіпсіз мінез-құлық үлгілері көрсетілді. Сонымен қатар интерактивті оқыту элементтері қолданылды.
Акция барысында кәмелетке толмағандардың қатысуымен болатын жол-көлік оқиғаларының алдын алу, оқушылардың құқықтық сауаттылығын арттыру және өз қауіпсіздігі мен айналасындағылардың қауіпсіздігіне жауапкершілікпен қарау мәселелеріне ерекше назар аударылды.
