Солтүстік Қазақстан облысы Мағжан Жұмабаев ауданында діни экстремизмнің алдын алу жұмыстары күшейтілуде

Мағжан Жұмабаев ауданында діни экстремизмнің алдын алу, азаматтарды әлеуметтік бейімдеу және құқықтық сауаттылықты арттыру бағытындағы жұмыстар жүйелі түрде жалғасуда. Ақпараттық-түсіндіру іс-шаралары аясында мемлекеттік органдар мамандары мен полиция қызметкерлері тұрғындармен кездесулер өткізіп, деструктивті діни ағымдардың алдын алу және қоғамда тұрақты рухани құндылықтарды қалыптастыру мәселелерін талқылауда, деп хабарлайды SKO24.kz.

Ағымдағы жылдың 24 сәуірінде аудандық пробация қызметінің есебінде тұрған азаматтармен профилактикалық кездесу өтті. Іс-шараға Мағжан Жұмабаев ауданы әкімдігінің ішкі саясат бөлімінің бас маманы А.И. Абсаликова, аудандық Мансап орталығы филиалы секторының меңгерушісі О.В. Илюшина және аудандық пробация қызметі бөлімінің аға инспекторы, әділет майоры М.А. Исин қатысты.

Кездесу барысында қатысушыларға діни сауаттылықты арттырудың маңыздылығы түсіндіріліп, радикалды идеялардың таралуының алдын алу жолдары талқыланды. Сонымен қатар Мансап орталығы арқылы жұмысқа орналасу мүмкіндіктері мен мемлекеттік бағдарламаларға қатысу тетіктері жөнінде кеңінен ақпарат берілді. Мамандар мемлекеттік қолдау шараларын түсіндіріп, жұмысқа орналасу бойынша тәжірибелік кеңестер ұсынып, қатысушылардың сұрақтарына жауап берді.

Ұйымдастырушылардың айтуынша, мұндай кездесулер азаматтардың әлеуметтік бейімделуіне, құқық бұзушылықтардың алдын алуға және өмірлік ұстанымдарды нығайтуға оң әсер етеді.

Аталған жұмыстардың жалғасы ретінде 2026 жылғы 3 мамырда аудандық полиция бөлімі қызметкерлері әлеуметтік осал топ өкілдерімен кездесу өткізді. Ақпараттық-түсіндіру жұмыстары аясында тұрғындарға деструктивті діни ағымдардың қауіптілігі, интернет-алаяқтықтың алдын алу, сондай-ақ діни экстремизм мен терроризмге қарсы күрес мәселелері түсіндірілді.

Кездесу барысында радикалды идеологиялардың қоғамға тигізер зияны, азаматтарды заңсыз әрекеттерге тарту тәсілдері және терроризм сипатындағы қылмыстар үшін Қазақстан Республикасының заңнамасында көзделген қылмыстық жауапкершілік жөнінде кеңінен айтылды. Террористік әрекеттерді ұйымдастыру, қаржыландыру, үгіт-насихат жүргізу және террористік топтарға қатысу ауыр қылмыс болып саналатыны, мұндай құқық бұзушылықтар үшін ұзақ мерзімге бас бостандығынан айыру, тіпті өмір бойына соттау жазасы қарастырылғаны атап өтілді.

Іс-шаралар барысында барлығы 20-ға жуық адам қамтылды. Мамандардың пікірінше, мұндай кездесулер экстремизмнің алдын алуда, құқықтық мәдениетті нығайтуда және қоғамда радикалды идеологияларға қарсы иммунитет қалыптастыруда маңызды рөл атқарады.