СҚО жаналықтары
Солтүстік Қазақстан облысында «Заң және Тәртіп» тұжырымдамасын іске асыру аясында балаларға арналған «Құтқарушының бір күні» атты ауқымды профилактикалық акция өтті, деп хабарлайды SKO24.kz.
Іс-шара барысында оқушылар үшін өрт сөндіру бөлімдеріне экскурсиялар ұйымдастырылып, қатысушылар құтқару қызметінің жұмысымен жақынырақ танысуға мүмкіндік алды. Балаларға өрт сөндіру техникалары, арнайы автокөліктердің жабдықталуы көрсетіліп, төтенше жағдайлар кезінде қолданылатын құралдардың қызметі түсіндірілді.
Сонымен қатар мамандар оқушыларға өрт кезінде және басқа да төтенше жағдайларда дұрыс әрекет ету жолдарын түсіндіріп, қауіпсіздік ережелерін сақтау маңыздылығына ерекше тоқталды. Балалар күнделікті өмірде сақтық шараларын сақтау, өз өмірі мен айналасындағы адамдардың қауіпсіздігіне жауапкершілікпен қарау жөнінде маңызды ақпарат алды.
Акция барысында оқушылар құтқарушы мамандығының ерекшеліктері, жауапкершілігі мен маңыздылығы туралы жан-жақты мағлұмат алды. Осындай кездесулер жасөспірімдердің қауіпсіздік мәдениетін қалыптастыруға, құқықтық санасын арттыруға және құтқару саласындағы мамандықтарға қызығушылығын оятуға бағытталған.
Ұйымдастырушылардың айтуынша, мұндай профилактикалық іс-шаралар өскелең ұрпақтың қауіпсіздік дағдыларын нығайтуға және қоғамдағы жауапкершілік мәдениетін дамытуға ықпал етеді.
