Биыл Петропавлда жол өтпесінің құрылысы аяқталады

Солтүстік Қазақстан облысының әкімі Ғауез Нұрмұхамбетов Жұмысшы кентіндегі Универсальная көшесі бойындағы теміржол арқылы өтетін жаңа автомобиль өткелінің құрылыс барысын тексерді, деп хабарлайды SKO24.kz.

Бұл қаланың көліктік қолжетімділігін және тұрғындардың қолайлылығын жақсарту үшін қажетті негізгі инфрақұрылымдық нысандардың бірі. Жобаны іске асыру қолданыстағы жол өткелін жеңілдетіп қана қоймай, қаланың солтүстік-шығыс бөлігіне баламалы кіруді қамтамасыз етеді.

Құрылыс алаңында өңір басшысы орындалған жұмыстар туралы есепті тыңдап, мердігермен ағымдағы міндеттерді талқылады және мерзімдер мен жоғары сапа стандарттарын қатаң сақтауға назар аударды. Жаңа нысанды пайдалануға беру ағымдағы жылға жоспарланған.

Көпірдің құрылысы қыс мезгілінде де жалғасуда. Аралық құрылыс арқалықтарын монтаждау жүріп жатыр. Сондай-ақ, қала тұрғындарына ыңғайлы болуы үшін асфальт-бетон жабыны, кіреберіс жолдар, жаяу жүргіншілер тротуары мен баспалдақтар салу жоспарланған.