СҚО жаналықтары
«Радуга» компаниясының бас директорының орынбасары Дәурен Қатранов Қазақстандағы Конституциялық реформаны қолдайтынын мәлімдеп, солтүстікқазақстандықтарды референдумға белсенді қатысуға шақырды. Ол мұндай маңызды саяси шешімдер елдің болашақ дамуына тікелей әсер ететінін атап өтті, деп хабарлай SKO24.kz.
Қатрановтың айтуынша, ұсынылып отырған өзгерістер заман талабына сай келеді және мемлекет пен қоғамның қазіргі әлеуметтік-экономикалық даму үдерістеріне жауап береді. Конституцияға енгізілетін түзетулер мемлекеттік басқару жүйесін жетілдіруге, құқықтық тетіктерді күшейтуге және азаматтардың құқықтарын қорғауды нығайтуға бағытталған.
Сонымен қатар ол реформаның бизнесті дамытуға, жеке меншікті қорғауға және кәсіпкерлік үшін қолайлы әрі болжамды құқықтық орта қалыптастыруға мүмкіндік беретінін айтты. Оның пікірінше, бұл қадам отандық кәсіпкерлердің жұмысын жеңілдетіп, инвестициялық тартымдылықты арттырады.
Сондай-ақ Қатранов өңірдегі кәсіпкерлер қауымдастығы реформаны оң бағалап отырғанын жеткізді. Оның пайымдауынша, Конституциялық өзгерістер экономикалық тұрақтылықты нығайтып, мемлекеттік институттардың тиімділігін арттырып және халықаралық серіктестердің сенімін күшейтуге ықпал етеді.
Компания өкілі азаматтарды өз таңдауын саналы түрде жасап, референдумға қатысу арқылы белсенді азаматтық ұстаным танытуға шақырды.
