Солтүстік Қазақстан облысында бизнес өкілдері Қазақстан Республикасы жаңа Конституциясының жобасы бойынша өтетін республикалық референдумды қолдады

Солтүстік Қазақстан облысында бизнес өкілдері Қазақстан Республикасы жаңа Конституциясының жобасы бойынша алдағы республикалық референдумды белсенді түрде қолдауда. Кәсіпкерлердің пікірінше, бұл – ел үшін аса маңызды қадам. Өңірдегі бірқатар кәсіпорындар өз азаматтық ұстанымдарын білдірді. Солардың қатарында «Радуга» ЖШС бар, деп хабарлайды SKO24.kz.

«Радуга» ЖШС 1993 жылы Петропавл қаласында құрылған. Компания отыз жылдан астам уақыт бойы тұрақты дамып, Қазақстан нарығындағы өз позициясын нығайтып келеді. Кәсіпорын басшылығы алдағы республикалық референдум мен ұсынылып отырған конституциялық өзгерістердің маңызы туралы өз пікірлерін білдірді.

«Мен Қазақстан Республикасының жаңа Конституциясы жобасын қолдаймын. Оның ережелері мемлекеттілікті одан әрі нығайтуға, экономиканы дамытуға және қоғам мен бизнес мүдделерінің теңгерімін қамтамасыз етуге бағытталған деп санаймын. Жаңа Конституция еліміздің алдағы кезеңдегі тұрақты дамуына берік негіз болады деп сенемін», – деді «Радуга» ЖШС атқарушы директоры Петр Шарапаев.

Басшылықтың ұстанымын кәсіпорын қызметкерлері де қолдады. Олардың айтуынша, референдумға қатысу – өз азаматтық ұстанымын білдіріп, мемлекеттің одан әрі дамуына үлес қосу мүмкіндігі.

«Жаңа Конституция еліміздегі әділеттілікті нығайтады деп ойлаймын. Мен үшін зауыт қызметкері әрі азамат ретінде заң мен тәртіптің сақталуы, қауіпсіздік талаптарының орындалуы және өмір сүруге қолайлы жағдайлардың болуы маңызды. Елде тәртіп болса, әркім ертеңгі күнге сеніммен қарайды. Мен жаңа Конституцияны қолдаймын», – деді серіктестік қызметкері Елеуке Жақсылық.

Айта кетейік, Қазақстан Республикасы жаңа Конституциясының жобасы бойынша республикалық референдум биыл 15 наурызда өтеді. Бұл күні ел азаматтары мемлекеттің саяси және қоғамдық дамуының алдағы бағытын айқындайтын таңдау жасайды.