Петропавл жаңалықтары
Заречный кентінің бірнеше тұрғыны Ашық есік күні барысында Петропавл әкімі Серік Мұхамедиевке жүгініп, қоныс аудару, өтемақы және жер телімдерінің болашағына қатысты өздерін алаңдатқан сұрақтарды қойды, деп хабарлайды SKO24.kz.
Петропавлда Заречный кентінің тұрғындарын қоныс аудару жұмыстары басталған. Өткен жылдың соңында ондаған отбасы жаңа көпқабатты үйден пәтер кілттерін алды. Қала әкімі екінші көпқабатты үйдің құрылысы мамыр айының соңына дейін, ал үшінші үйдің құрылысы күзге қарай аяқталатынын мәлімдеді. Алайда барлық тұрғындар көшуге келісіп отырған жоқ.
«Көшкісі келмейтіндер бас тартуына болады. Бұл үшін бас тартуды жазбаша түрде рәсімдеу қажет. Бірақ мұндай жағдайда ықтимал су тасқыны кезінде өтемақы төленбейді. Бас тартқан азаматтар сол жерде қалады — біз ешкімді күштеп көшіруге міндетті емеспіз», — деді әкім.
Тұрғындар қоныс аудару кезінде оларға тең дәрежедегі тұрғын үй берілетініне күмән келтіріп, алаңдаушылық білдірді. Себебі кейбір үйлердің аумағы айтарлықтай үлкен.
«Тұрғын үй жағдайының нашарлауына немесе шаршы метр көлемінің азаюына заңмен жол берілмейді. Егер үйдің аумағы 150 шаршы метр болса, біз прокуратурамен бірлесіп мәселені қарастырамыз: не қаржылай өтемақы төлейміз, не тұрғын үй береміз, ал айырмашылық бойынша қосымша өтемақы қарастырылуы мүмкін. Заречный кентінің аумағын рекреациялық аймаққа айналдыру жоспарланып отыр. Егер тұрғын бас тартса, сол жерде тұра береді, бірақ көшкен азаматтардың үйлері бұзылады. Ол аумақта болашақта жасыл желек отырғызу көзделген», — деді Серік Мұхамедиев.
Кездесу барысында тұрғындар қоныс аударудың құқықтық негіздеріне, тиісті нормативтік актілерге және аумақты зерттеу қорытындыларына қатысты сұрақтар қойды.
Әкімнің айтуынша, Заречный кентіне зерттеу жүргізіліп, оны су тасқынынан толық қорғау мүмкін еместігі туралы қорытынды берілген. Мамандар гидротехникалық құрылыстар салу мүмкіндігін қарастырған.
«Егер қорғаныс құрылыстарын салсақ, Заречный шұңқыр тәрізді аумақта қалады. Қоршау құрылысымен ғана шектелеміз. Мұндай шараларға шамамен 13 миллиард теңге қажет. Аумақты су тасқынынан ішінара қорғауға болады, бірақ жер асты суларынан толық қорғау мүмкін емес. Айналада су жиналған жағдайда ылғал топырақ арқылы жоғары көтеріліп, су басу қаупі сақталады», — деп түсіндірді қала әкімі.
Тұрғындарды әсіресе үйлерінің құқықтық мәртебесі мен заңдық қорғалуы мәселелері алаңдатты. Осыған байланысты талқылау қызу пікір алмасуға ұласты.
Тұрғын мен әкім арасындағы диалог барысында тараптар су басу аймағының анықталуы мен үйлердің тұруға жарамдылығы мәселесін талқылады.
Тұрғындардың сұрақтары қоныс аудару мәселесінің әлі де өзекті әрі қоғам үшін маңызды тақырып екенін көрсетеді.
