СҚО жаналықтары
Солтүстік Қазақстан облысында Қазақстан Республикасының жаңа Конституциясы жобасын түсіндіру бойынша халық арасында ақпараттық жұмыс белсенді түрде жалғасуда. Мұндай кездесулер мүмкіндігінше көп адамды қамтып, Ата Заңның негізгі қағидаларын жеткізу мақсатында өткізіліп келеді. Бұл жолы жаңа Конституция жобасының негізгі тұстары «Петропавл жолдары» ЖШС қызметкерлеріне түсіндірілді, деп хабарлайды SKO24.kz.
«Петропавл жолдары» ЖШС мердігерлік ұйымының ұжымымен кездесуді өңірлік Жолаушылар көлігі және автомобиль жолдары басқармасының өкілдері өткізді. Кездесу барысында жаңа Конституция жобасының басты ережелері талқыланды. Құжатта Қазақстан Республикасы демократиялық, зайырлы, құқықтық және әлеуметтік мемлекет екені атап көрсетілген. Сондай-ақ мемлекеттің ең жоғары құндылықтары – адам, оның өмірі, құқықтары мен бостандықтары екені айқындалған.
Сонымен қатар жобаға азаматтардың цифрлық ортадағы құқықтарын қорғау нормасы алғаш рет енгізілгені айтылды. Бұл мемлекеттің заманауи талаптарға сай дамуға және қазіргі сын-қатерлерді ескеруге ұмтылысын көрсетеді. Спикерлердің пікірінше, технологиялардың қарқынды дамуы мен қоғам өмірінің барлық саласының цифрлануы жағдайында бұл норма ерекше өзектілікке ие.
Кездесу барысында жоба аясында адами капиталды дамытуға, білімге, ғылымға, мәдениет пен инновацияларға ерекше назар аударылғаны атап өтілді. Бұл мемлекет болашағы табиғи ресурстарға ғана емес, ең алдымен азаматтардың білімі мен жетістіктеріне негізделетінін білдіретін маңызды бағыт екені айтылды.
Сондай-ақ қатысушыларға 15 наурызда өтетін республикалық референдум туралы еске салынды. Солтүстік Қазақстан облысында бұл күні шамамен 365 мың адам дауыс бере алады.
