СҚО жаналықтары
Солтүстік Қазақстандық спортшы, конькимен жүгіруден жасөспірімдер арасындағы әлем чемпионы Кристина Шумекова әлеуметтік желілерде қазақстандықтарға арнап үндеу жариялап, алдағы референдум туралы пікірін білдірді және азаматтарды белсенділік танытуға шақырды, деп хабарлайды SKO24.kz.
Спортшы өз видеоүндеуінде әрбір жеңіс таңдаудан басталатынын - алға ұмтылу, өзіңмен жұмыс істеу және болашаққа сену шешімінен басталатынын атап өтті. Оның айтуынша, бүгін ел азаматтарының алдында да маңызды таңдау тұр - өз ұстанымын білдіруге және мемлекет дамуына үлес қосуға мүмкіндік беретін референдумға қатысу.
Шумекова спорттың жауапкершілікке, тәртіпке және ережелерді құрметтеуге үйрететінін айтты. Оның пікірінше, дәл осы қасиеттер спортшыларға халықаралық аренада табысқа жетуге көмектеседі әрі мемлекеттің нығаюына ықпал етеді.
Конькиші жақында қол жеткізген жетістігін де атап өтті - жасөспірімдер арасындағы әлем чемпионатында 500, 1000 және 1500 метр қашықтықтарында үш алтын медаль жеңіп алды. Спортшы бұл жеңісті тек жеке жетістігі емес, бүкіл елдің қолдауының нәтижесі деп санайтынын жеткізді.
Үндеуінің соңында Кристина Шумекова қазақстандықтардың референдумға қатысуының маңыздылығын атап өтіп, әрбір азаматтың дауысы Қазақстанның болашағына қосылған үлес екенін айтты.
