Оңай табыс қылмыстық жауапкершілікке әкелуі мүмкін — СҚО полицейлері дропперлер туралы ескертеді

Солтүстік Қазақстан облысында интернет-алаяқтыққа қарсы профилактикалық жұмыстар жалғасуда. Полиция қызметкерлері соңғы уақытта жастар мен студенттер жиі тартылып жатқан дропперлік мәселесіне ерекше назар аударып отыр, деп хабарлайды SKO24.kz.

Дроппер деп алаяқтарға ұрланған ақшаны аудару немесе қолма-қол ақшаға айналдыру үшін өзінің банк картасын, шотын немесе телефон нөмірін пайдалануға беретін адамды айтады. Көбінесе қаскөйлер мұндай «көмекшілерді» әлеуметтік желілер, мессенджерлер мен хабарландыру сайттары арқылы іздеп, тәжірибесіз-ақ оңай табыс табуға болатынын уәде етеді.

Полицейлердің айтуынша, әлеуетті дропперлерге банк картасын рәсімдеу, оған ақша қабылдау немесе карта деректерін үшінші тұлғаларға беру ұсынылады. Сонымен қатар жастарды мұндай әрекеттерде заңсыз ештеңе жоқ екеніне сендіруге тырысады.

Алайда интернет-алаяқтық құрбандарынан ұрланған қаражат дәл осындай дропперлердің шоттары арқылы өткізіледі. Соның салдарынан карта иесі қылмыстық схеманың қатысушысына айналып, қылмыстық әрі азаматтық-құқықтық жауапкершілікке тартылуы мүмкін.

Қазақстан Республикасы Азаматтық кодексінің 953-бабына сәйкес, басқа адамның есебінен негізсіз мүлік немесе ақша алған тұлға оны толық көлемде қайтаруға міндетті. Яғни дроппер аударылған қаражаттың аз ғана бөлігін өзінде қалдырса да, жәбірленушіге келтірілген шығынды толық өтеуге міндеттеледі.

Бұдан бөлек, 2025 жылғы қыркүйектен бастап Қазақстан Республикасы Қылмыстық кодексінің 232-1-бабы күшіне енді. Аталған бап банк шоттарын, төлем құралдарын және олардың деректемелерін заңсыз беру үшін қылмыстық жауапкершілікті көздейді. Жаза айыппұлдан бастап бас бостандығынан айыруға дейін қарастырылған.

Полиция қызметкерлері тұрғындарды «оңай табыс» туралы күмәнді ұсыныстарға сенбеуге, банк карталарын, SIM-карталарды және растау кодтарын бөгде адамдарға бермеуге шақырады. Сондай-ақ балалар мен жақындарын мұндай қауіптер туралы алдын ала ескерту қажет екенін атап өтеді.

Тәртіп сақшыларының сөзінше, күмәнді схемаларға қатысқаны үшін алынған бірнеше мың теңге кейін үлкен қаржылық шығындар мен заң алдындағы күрделі мәселелерге алып келуі мүмкін.