СҚО полициясы тұрғындарға романтикалық танысу арқылы әрекет ететін интернет-алаяқтар туралы ескерту жасады

Интернет-алаяқтық бүгінгі күні ең өзекті мәселелердің бірі болып отыр. Солтүстік Қазақстан облысында өзін банк немесе мемлекеттік орган қызметкері ретінде таныстыратын алаяқтармен қатар, романтикалық танысу арқылы әрекет ететін қаскөйлер де көбейіп келеді. Олардың басты ерекшелігі – бірден ақша талап етпейді. Алдымен адамның сеніміне кіріп, кейін оның сезімі мен сенімін өз пайдасына пайдаланады, деп хабарлайды SKO24.kz.

Әдетте алаяқтар әлеуметтік желілерде, мессенджерлерде немесе танысу сайттарында жалған аккаунттар ашады. Өздерін табысты кәсіпкер, әскери қызметкер, дәрігер немесе шетелде жұмыс істейтін азамат ретінде таныстырады. Бірнеше апта, кейде бірнеше ай бойы жәбірленушімен тұрақты байланыста болып, қамқорлық танытып, қолдау көрсетіп, шынайы сезім бар деген әсер қалыптастырады.

Адамның сеніміне толық кіргеннен кейін алаяқтықтың келесі кезеңі басталады. Қаскөйлер түрлі сылтаумен ақша сұрайды. Көбіне олар жол-көлік оқиғасына ұшырағанын айтып, емделуге қаражат қажет екенін жеткізеді. Тағы бір кең таралған тәсіл – қымбат сыйлық немесе сәлемдеме жібергенін, бірақ оның шекарада ұсталып қалғанын айтып, кедендік төлемді, сақтандыруды немесе жеткізу қызметінің ақысын төлеуді өтінеді.

Әңгімеге сенген адам көрсетілген банк шотына ақшаны өз еркімен аударады. Қаражат қолға тиген соң алаяқ байланысын үзіп кетеді немесе жаңа сылтау тауып, қайтадан ақша сұрай бастайды. Соның салдарынан жәбірленуші материалдық шығынға ғана емес, ауыр психологиялық күйзеліске де ұшырайды.

Солтүстік Қазақстан облысы полиция департаменті мұндай жағдайлардың интернет-алаяқтықтың кең таралған түрлерінің бірі екенін ескертеді. Мамандар тұрғындарды қырағы болуға, тек интернет арқылы танысқан адамдарға ақша аудармауға, кез келген ақпаратты мұқият тексеруге және эмоцияға берілмеуге шақырады.

Ең бастысы – сенім бейтаныс адамға ақша аударуға себеп болмауы керек. Егер алаяқтық белгілері байқалса, қарым-қатынасты дереу тоқтатып, аккаунтты бұғаттап, полицияға жүгіну қажет.