СҚО құтқарушылары тұрғындарға судағы қауіпсіздік ережелерін еске салды

Шомылу маусымында Солтүстік Қазақстан облысы Төтенше жағдайлар департаментінің қызметкерлері өңірдегі су айдындарында профилактикалық рейдтер өткізіп, тұрғындарға түсіндіру жұмыстарын жалғастыруда. Мұндай шаралардың басты мақсаты – судағы жазатайым оқиғалардың алдын алу және демалыс кезінде сақталуы тиіс қарапайым, бірақ аса маңызды қауіпсіздік ережелерін еске салу, деп хабарлайды SKO24.kz.

Құтқарушылар балалардың қауіпсіздігіне ерекше көңіл бөлуде. Мамандардың айтуынша, кәмелетке толмағандар ересектердің қарауынсыз қалған жағдайда қауіп-қатерге жиі ұшырайды. Тіпті бірнеше минуттық бақылаусыз қалдырудың өзі қайғылы жағдайға әкелуі мүмкін. Сондықтан ата-аналарға балаларды өзен, көл және басқа да су айдындарының маңында қараусыз қалдырмау, сондай-ақ ересектердің еріп жүруінсіз суға түсуіне жол бермеу қатаң ескертіледі.

ТЖД мамандары тек арнайы жабдықталған жағажайларда ғана демалуға кеңес береді. Ондай орындарда құтқарушылар кезекшілік атқарып, қауіпсіздік талаптары сақталған. Тереңдігі мен түбі белгісіз су айдындарына түсуге болмайды. Сондай-ақ «Суға түсуге болмайды», «Сүңгуге болмайды» немесе «Қауіпті! Иірім» деген ескерту белгілері қойылған аумақтарға кіруге тыйым салынады.

Мамандар алкогольдік ішімдік ішкеннен кейін суға түсудің аса қауіпті екенін де еске салады. Мас күйінде адамның қимыл-қозғалысы баяулап, жағдайды дұрыс бағалау қабілеті төмендейді, бұл қайғылы оқиғалардың орын алу қаупін бірнеше есе арттырады. Бұдан бөлек, қалқымалы белгілерден асып жүзуге, қайықтар мен катерлерге жақындауға және тексерілмеген жерлерде сүңгуге болмайды.

Құтқарушылар автокөлік камералары, үрлемелі матрастар және ашық суда пайдалануға арналмаған басқа да заттарды жүзу құралы ретінде қолданбауға шақырады. Сондай-ақ көпірлерден, пирстерден, қайықтардан, жартастардан және суға түсуге арналмаған басқа да нысандардан секіруге болмайды.

Мамандардың мәліметінше, жаз мезгілінде болатын қайғылы оқиғалардың басым бөлігі арнайы жабдықталған жағажайларда емес, саяжай маңындағы, өзен-көл жағасындағы немесе бақылаусыз стихиялық демалыс орындарында тіркеледі. Көп жағдайда адамдар мұндай жерлерге аз уақытқа ғана сергіп шығуды жоспарлағанымен, дәл осындай орындарда қауіп деңгейі жоғары болады.

Солтүстік Қазақстан облысының Төтенше жағдайлар департаменті тұрғындарды қарапайым қауіпсіздік ережелерін қатаң сақтауға шақырады. Әсіресе балаларға мұқият болу, жауапкершілік таныту және суда өзін дұрыс ұстау адам өмірі мен денсаулығын сақтауға көмектеседі.