Солтүстік Қазақстан облысының әкімі Мағжан Жұмабаев ауданына жұмыс сапарымен барып, өңірдің даму барысымен жан-жақты танысты

Солтүстік Қазақстан облысының әкімі Ғауез Нұрмұхамбетов жұмыс сапары аясында Мағжан Жұмабаев ауданына барып, ауданның әлеуметтік-экономикалық даму көрсеткіштерімен, ауыл шаруашылығы саласындағы жұмыстардың барысымен және тұрғындардың тұрмыс сапасын арттыруға бағытталған маңызды жобалардың жүзеге асырылуымен жан-жақты танысты. Бұл туралы СҚО әкімдігінің баспасөз қызметіне сілтеме жасап, SKO24.kz хабарлады.

Сапар барысында өңір басшысы бірқатар әлеуметтік маңызы бар нысандарды аралап, ауыл шаруашылығы тауарын өндірушілермен кездесу өткізді, сондай-ақ аудан тұрғындарымен ашық пікір алмасып, олардың ұсыныс-пікірлерін тыңдады.

Бүгінде Солтүстік Қазақстан облысында ауыл шаруашылығы саласындағы ең маңызды әрі жауапты кезеңдердің бірі – кең көлемді егін жинау науқаны ресми түрде басталды. Осыған байланысты облыс әкімі аудан егістіктерін аралап, дала жұмыстарын ұйымдастыру деңгейімен, заманауи техникалардың жұмысымен және өнім жинау барысымен егжей-тегжейлі танысты. Сонымен қатар, өңір басшысы жергілікті ауыл шаруашылығы кәсіпорындарының басшыларымен және шаруалармен кездесіп, аграрлық сектордағы қазіргі жағдайды, мемлекеттік қолдау шараларының тиімділігін, сондай-ақ сала мамандарын толғандыратын өзекті мәселелерді кеңінен талқылады.

Кездесу барысында Ғауез Нұрмұхамбетов мемлекет тарапынан көрсетіліп жатқан қолдаудың, ауыл еңбеккерлерінің кәсіби тәжірибесі мен тынымсыз еңбегінің арқасында көктемгі егіс жұмыстары белгіленген мерзімде әрі жоғары сапада аяқталғанын атап өтті. Оның айтуынша, қолайлы ауа райы жағдайында облыс диқандары биылғы егін жинау науқанын табысты аяқтап, мол өнімге қол жеткізеді деген сенім мол. Сонымен қатар, облыс әкімі ауыл шаруашылығы құрылымдарының өндірістік қызметпен қатар ауылдық елді мекендердің әлеуметтік дамуына қосып отырған үлесін ерекше атап өтіп, олардың әлеуметтік жауапкершілігі бүгінде өңірді дамытудағы маңызды факторлардың біріне айналғанын жеткізді.

Биыл аудан әкімдігі мен жергілікті ауыл шаруашылығы құрылымдары арасында жалпы құны 1,3 миллиард теңгені құрайтын ынтымақтастық туралы меморандумға қол қойылды. Құжат аясында халықтың тұрмыс сапасын жақсартуға бағытталған көптеген әлеуметтік жобаларды жүзеге асыру жоспарланған. Соның нәтижесінде Чистовское ауылындағы Мәдениет үйіне 300 миллион теңгеге күрделі жөндеу жүргізіліп, ғимарат толықтай жаңартылды. Ал Таманское ауылында құны 80 миллион теңге болатын жаңа әрі заманауи спорт стадионы пайдалануға берілді. Бұдан бөлек, әлеуметтік жауапкершілікті жоғары деңгейде сезінетін 10 ауыл шаруашылығы кәсіпорны өз қаражаты есебінен жаңа медициналық автокөліктер сатып алып, олар ауданның 11 ауылдық округінің тұрғындарына сапалы әрі жедел медициналық қызмет көрсетуге бағытталды.

Жұмыс сапары барысында облыс әкімі «СК Агро 2050» ЖШС-нің Мағжан Жұмабаев ауданында салынып жатқан ауқымды сүт-тауар кешенінің алғашқы кезеңінің іске қосылу рәсіміне қатысты. Жалпы қуаттылығы 12 мың бас ірі қара малға есептелген бұл кешен еліміздегі сүт өндірісін дамытуға бағытталған ең ірі инвестициялық жобалардың бірі болып саналады. Кәсіпорын Германияның GEA Westfalia компаниясы шығарған бір мезгілде 100 сиырға қызмет көрсете алатын «карусель» үлгісіндегі Орталық Азиядағы ең ірі сауу қондырғысымен жабдықталған. Мұнда барлық өндірістік процестер халықаралық стандарттарға сәйкес автоматтандырылған және заманауи технологиялар негізінде ұйымдастырылған.

Жобаны жүзеге асыруға жалпы көлемі 30 миллиард теңгеге жуық инвестиция бағытталады. Кәсіпорын толық өндірістік қуатына шыққан кезде 120-дан астам тұрақты жұмыс орны ашылып, аудан тұрғындары жаңа жұмыспен қамтылады. Биылғы жылдың басынан бері Германиядан әуе көлігі арқылы 550-ден астам асыл тұқымды ірі қара мал жеткізілсе, жыл соңына дейін Еуропа елдерінен тағы 660 бас мал әкелу жоспарланып отыр.

Сонымен қатар, Булаев қаласында орналасқан Жас техниктер үйіне жүргізіліп жатқан күрделі жөндеу жұмыстары аяқталуға жақын. Жаңартылған мекеме пайдалануға берілгеннен кейін мұнда балалар мен жасөспірімдер үшін робототехника, картинг, авиаүлгілеу және сәндік-қолданбалы өнер бағыттары бойынша тегін үйірмелер жұмыс істейтін болады. Бұл өз кезегінде аудан жастарының шығармашылық және техникалық қабілеттерін дамытуға жаңа мүмкіндіктер ашады. Сондай-ақ, бүгінде ауданда заманауи IT-орталық табысты жұмыс істеп, ақпараттық технологияларға қызығушылық танытқан жастар үшін маңызды білім беру алаңына айналып отыр.

Ауданда жол-көлік инфрақұрылымын жаңғырту жұмыстары да жүйелі түрде жалғасуда. Биыл «Булаево – Молодогвардейское» және «Петропавл – Ресей Федерациясының шекарасы» бағытындағы республикалық маңызы бар автомобиль жолдарын қайта жаңарту бойынша ауқымды жобалар жүзеге асырылуда. Сонымен қатар, облыстық және аудандық маңызы бар жолдарда да жөндеу жұмыстары қарқынды жүргізілуде. Атап айтқанда, «Булаево – Советское» автомобиль жолында ағымдағы жөндеу басталып, «Ұзынкөл – Возвышенка» жолының бір бөлігін орташа жөндеу жұмыстары аяқталуға жақындады. Бұдан бөлек, «Қарағанды – Надежка» учаскесіндегі жөндеу жұмыстары толық аяқталса, «Пулеметовка – Таманское» бағытындағы жолды қалпына келтіру жұмыстары жоспарлы түрде жалғасуда.

Жұмыс сапары аясында облыс әкімі аудандық полиция бөлімінде жаңадан ашылған Жедел басқару орталығының қызметімен де танысты. Заманауи орталық қажетті серверлік жабдықтармен, үздіксіз электр қуатымен қамтамасыз ету жүйелерімен, жаңа байланыс құралдарымен және үш жұмыс орны бар арнайы операторлық залмен жабдықталған. Сонымен қатар, бейнебақылау жүйесі едәуір кеңейтіліп, Бұлаев қаласының негізгі көшелері мен қоғамдық орындарын қамтитын қосымша 72 бейнекамера, сондай-ақ көлік қозғалысының жылдамдығын автоматты түрде тіркейтін 3 аппараттық-бағдарламалық кешен орнатылды. Бұған дейін жұмыс істеп тұрған 75 бейнекамераның көмегімен жыл басынан бері 7 қылмыс ашылып, жүздеген құқық бұзушылық анықталған.

Сапар соңында облыс әкімі ауданның ақсақалдарымен, қоғам белсенділерімен және жергілікті тұрғындармен кездесіп, ашық форматтағы диалог өткізді. Кездесу барысында елді мекендердің әлеуметтік-экономикалық даму перспективалары, инженерлік және жол инфрақұрылымын жетілдіру, әлеуметтік нысандардың жұмысын жақсарту, халықтың әл-ауқатын арттыру және ауылдық аумақтардың тұрақты дамуын қамтамасыз ету мәселелері жан-жақты талқыланды. Өңір басшысы тұрғындардың көтерген барлық ұсыныстары мен өтініштері назарға алынатынын айтып, алдағы уақытта ауданның дамуына бағытталған жұмыстар жүйелі түрде жалғасатынын жеткізді.